सोलापूरच्या यशस्विनी कंपनीची गरुडझेप, महिन्याला ४ कोटींची उलाढाल करणाऱ्या अनिता माळगेंची गोष्ट – MSN

Written by

महाराष्ट्रात महात्मा फुले आणि क्रांतीज्योती सावित्रीबाई फुले यांनी स्त्री शिक्षणाची पायाभरणी केली. स्वातंत्र्यानंतर स्त्रियांना मतदानाचा अधिकार मिळाला. आर्थिक निर्णय प्रक्रियेत स्त्रियांचं जिथं मत विचारात घेतलं जातं तिथं निर्णय चुकत नाही असं म्हटलं जातं. सोलापूर जिल्ह्यातील दक्षिण सोलापूर तालुक्यातील बोरामणी गावातील अनिता माळगे आणि त्यांच्या महिला सहकाऱ्यांनी यशस्विनी अ‍ॅग्रो फार्मर्स प्रोड्युसर कंपनी हे दाखवून दिलं आहे. अनिता माळगे यांच्या पुढाकारानं सुरु झालेल्या कंपनीशी जिल्ह्यातील लाखो महिला प्रत्यक्ष अप्रत्यक्ष स्वरुपात जोडल्या गेल्या आहेत.

इरफान शेख, सोलापूर : सोलापूर शहराजवळ असलेल्या बोरामणी(ता दक्षिण सोलापूर)येथे यशस्विनी अ‍ॅग्रो फार्मर्स प्रोड्युसर कंपनी कार्यरत आहे. ही देशातील पहिली महिला शेतकरी कंपनी ओळखली जाते. या कंपनीत तयार झालेल्या मालाला देशभर मागणी आहे. यशस्विनी शेतकरी उत्पादक कंपनीच्या संस्थापक अनिता माळगे यांनी आम्ही २०१५ मध्ये ही कंपनी स्थापन केल्याचं सांगितलं. शेतकरी वर्गातील महिलांना सामावून घेत त्यांना संधी दिली. आमच्या शेतकरी उत्पादक कंपनीच्या जवळपास १४०० भागधारक असून कोट्यवधींची उलाढाल केली जाते, असं त्या सांगतात. शेतीमालाला योग्य हमीभाव मिळावा यासाठी प्रयत्न आमच्या कंपनीकडून केला जात आहे. दक्षिण सोलापूर तालुक्यातील जवळपास एक हजार शेतकऱ्यांचा विविध प्रकारचा माल आम्ही विविध जिल्ह्यात विविध राज्यात विक्रीसाठी पाठवतो, असं त्या म्हणाल्या. देशातील विविध राज्यात विविध कार्यक्रमात सोलापूरच्या यशस्विनी शेतकरी उत्पादक कंपनीनं स्टॉल लावून मार्केटिंग देखील केलं आहे. अर्थमंत्री निर्मला सीतारामन,खासदार सुप्रिया सुळें,उपमुख्यमंत्री देवेंद्र फडणवीस यांनी देखील या कंपनीची दखल घेतल्याचं अनिता माळगे सांगतात.
​महिलांनी स्थापन केलेली पहिली शेतकरी उत्पादक कंपनी

अनिता माळगे यांनी सुरुवातीला परिसरातील महिला शेतकऱ्यांना एकत्र करत एक गट तयार केला.बोरामणी या गावात शेतकरी गटाची स्थापना त्यांनी केली. काही दिवसांनी महिला शेतकऱ्यांचे दहा गट तयार केले. दहा गटांना सामूहिक शेती,विक्री व्यवस्था,मार्केटिंग आदी विषयांवर तज्ज्ञांची मार्गदर्शन करण्यात आलं.दहा गटांच्या स्थापनेनंतर शंभर महिला जोडल्या गेल्या.आत्मा या संस्थेमार्फत या शेतकरी महिलांना सामूहिक शेती करण्यासाठी मार्गदर्शनपर शिबिरे घेऊन त्यांचा उत्साह वाढविण्यात आला.पाहता पाहता २०१५ पर्यंत या महिला गटांची संख्या १८ झाली जवळपास एक हजार महिला जोडल्या गेल्याचं अनिता माळगे सांगतात.
​२०१५ मध्ये कंपनीची स्थापना

शेतकरी महिला गट स्थापन केल्यानंतर शेतकरी महिलांची कंपनी स्थापन करण्यात आली. शेतकरी उत्पादक कंपनीची स्थापना करण्यापूर्वीचं उत्पादन व विक्री सुरू करण्यात आलं होतं.कंपनी स्थापन होण्याअगोदर या महिला विविध प्रकारच्या पिकांची लागवड करुन उत्पादन घेत होत्या. यशस्विनी अ‍ॅग्रो फार्मर्स प्रोड्युसर कंपनीची स्थापना २०१५ मध्ये करण्यात आली. कंपनीकडून ज्वारीपासून विविध वस्तू तयार करून विक्री केली जाऊ लागली. पुढे डाळ मिलची स्थापना करण्यात आली,मिरची कांडप मधून विविध प्रकारचे मसाले तयात करून त्याची योग्य पॅकिंग करून विक्रीची व मार्केटिंगची व्यवस्था करण्यात आली, असं अनिता माळगे सांगतात. तूर,मूग, हरभरा,उडीद, सोयाबीन,मका, गहू, बाजरी, ज्वारी या उत्पादनावर प्रक्रिया कंपनीद्वारे केली जाते. कडक भाकरी,लोणचे,मसाले यासारखे पदार्थ देखील यशस्विनी या कंपनीत तयार केले जात आहे.
​यशस्विनी अ‍ॅग्रोची संपूर्ण जबाबदारी महिलांवर

अनिता माळगे यांनी यशस्विनी अ‍ॅग्रो फार्मर्स प्रोड्युसर कंपनीत फक्त महिलाच काम करताना दिसतात, अशी माहिती दिली. प्रत्येक गटातील महिला विविध मालांचे उत्पादन घेतात.शेतकऱ्यांकडून माल घेऊन त्यावर प्रक्रिया करणे आणि त्याचे उत्पादन करून त्याची विक्री करण्याची जबाबदारी महिलाच पार पाडतात.जवळपास ३६ प्रकारची उत्पादनं या कंपनीद्वारे घेतली जातात. कंपनीचा वाढता व्याप आणि उलाढाल पाहून महिला शेतकऱ्यांच्या विविध समित्या या यशस्विनी अ‍ॅग्रो फार्मर्स प्रोड्युसर कंपनीत काम करतात.कंपनीच्या संचालक मंडळावर ही महिला शेतकरी काम करतात, अशी माहिती अनिता माळगे यांनी दिली.
​शेतकऱ्यांच्या शेतातून माल थेट ग्राहकांपर्यंत

पुणे,मुंबई,विविध प्रदर्शने,महोत्सवाच्या माध्यमातून शेतकऱ्यांचा माल शेतातून थेट ग्राहकांपर्यंत पोहोचवण्याची जबाबदारी यशस्विनी अ‍ॅग्रो फार्मर्स कंपनी पार पाडत आहे. कोणत्याही प्रकारच्या पॉलिशिंग शिवाय डाळ ग्राहकांना विक्री केली जाते. अनिता माळगे यांनी त्यांच्या शेतकरी उत्पादक कंपनीला डी मार्ट, रिलायन्स रिटेल, आयटीसीचा विक्रेता कोड मिळाल्याची माहिती दिली. रिलायन्स फ्रेश सारख्या मोठ्या कंपनीसोबत करार केल्याचं देखील अनिता माळगे यांनी सांगितलं. आमच्या कंपनीची दर महिन्याची उलाढाल 4 कोटी रुपयांची असल्याचं माळगे सांगतात. शेतकरी महिलांनी तयार केलेल्या मालाची लवकरच परदेशात विक्री केली जाणार आहे, अशी माहिती त्यांनी दिली.
३२ गावातील १४०० महिला शेअरधारक

आपली यशस्विनी अ‍ॅग्रो फार्मर्स प्रोड्युसर कंपनी दक्षिण सोलापूर जिल्ह्यातील ३२ गावातील १४०० महिलांनी एकत्र येत कंपनी स्थापन केली आहे. सध्या यशस्विनी कंपनीत ५० ते ५५ महिला जबाबदारी पार पाडतात. शेतकऱ्यांच्या मालावर प्रक्रिया करुन विक्री करतो, असं अनिता माळगे म्हणाल्या. सुरुवातीपासून खूप अडचणी आल्या पण आम्ही सकारात्मक राहिलो, असं त्या म्हणाल्या. नाबार्ड, आत्मासोबत स्मार्ट आणि मॅग्नेट प्रकल्पाचं सहकार्य मिळतं. सोलापूर जिल्ह्यात आत्माच्या माध्यमातून त्यांनी ९५ गट स्थापन केले आहेत.
नाबार्डसोबत त्रिपक्षीय करार, २२ कोटींच्या कर्जाचं वाटप

सोलापूर जिल्ह्यातील जवळपास दीड लाख महिला शेतकरी आमच्याशी जोडल्या गेल्याचं अनिता माळगे सांगतात. शेतीपुरक उद्योगासाठी आम्ही प्रत्येक महिलेला ५० हजार प्रमाणं एका गटाला पाच महिलांसाठी अडीच लाखांचं कर्ज याप्रमाणं २२ कोटींचं वाटप केल्याचं अनिता माळगे म्हणाल्या. आम्हाला नाबार्ड, विदर्भ कोकण बँक आणि यशस्विनी अ‍ॅग्रो फार्मर्स प्रोड्युसर कंपनी असा आमच्यात त्रिपक्षीय करार झाल्याचं माळगे म्हणाल्या. नाबार्डच्या माध्यमातून पाच शेतकरी उत्पादक कंपन्या स्थापन केल्याचं त्या म्हणाल्या. पंतप्रधान नरेंद्र मोदी यांनी आमच्या कंपनीचं कौतुक केल्याचं अनिता माळगे म्हणाल्या.

source

Article Tags:

Leave a Reply

Your email address will not be published. Required fields are marked *

Shares